عليك حق !

امبارح دخلت نمت بعد اذان الفجر بشوية , كنت مرهقة جدا و تعبانة بالرغم انى عارفة انى السهر بيتعبنى لكن يعتبر من اسوء عاداتى اللى مش قادرة اتخلص منها :/ و فجأة قعدت افكر كالعادة مابنامش علطول و الافكار تنزل اطنان ..قعدت افكر فى الموت وانى لو مت دلوقتى من غير ماعمل كل حاجة كنت ناوية وعايزة اعملها وانى غبية وضيعت وقت كتير .. قعدت افكر ف عمرى ..انا عندى كام سنة ؟!! اتفجئت لما عرفت خلال سنتين و 4 شهور هاكمل 28 سنة ازااااااااااااااااااى.. حصل امتى الكلام ده..انا اخر سن ليا فاكراه كان 21 او 23 !!!! امتى وفين وازاى !! انا لسه واقفة ف مكانى ومفيش حاجة اتغيرت فيا.. انا لسه زى مانا.. نفس الشخص وفى اللحظة دى ادركت ان حتى اباءنا و امهاتنا لسه جواهم نفس الطفل اللى محتاج حد يدله يعمل ايه او يطبطب عليه و يقف جنبه ..احنا دايما شايفنهم كبار وعارفين كل حاجة وفاهمين الدنيا ماشية ازاى هم بردو فجأة لقو نفسهم كبروا و ماروا بحاجات حاليا بنمر بيها خلتهم نشفوا واكثر تحملا وخبرة لكن لسه جواهم طفل محتاج طبطبة

زمان كنت باستغرب لما الستات مايحبوش يقولوا سنهم و كنت دايما اقول سنى بكل فخر و نفسى اكبر لكن دلوقتى لما حد يسألنى مبعرفش ارد مش عشان مش عايزة اقوله بس لانى فعلا مش فاكرة مابقتش احسبها ولاحساسى ان انا هو انا مفيش حاجة اتغيرت

راح تفكيري للجسم الشئ اللى يسكنه الروح اللى هى انا وانت و هى و كل الناس و زيه زى كل شئ له عمر وبيكبر و بيشيخ حتى يفنى... و كل واحد ونصيبه فى الجسم اللى روحه ساكنها ..فى ناس اجسامها بتكون ضعيفة او تعانى من مرض ما فبيكون نصيبها فى الحياة مش كتير ..الحمدلله على كل شئ.. كل شئ مقدر و ربنا هيعوضهم بحاجات احسن سواء فى الدنيا او الحياة الاخري

باستغرب من الناس اللى بتعمل كل عمليات التجميل الممكنة علشان تحافظ ع شكلها و شبابها مع انى شايفة كل وقت وليه جماله حتى التجاعيد بتكون جمال .. بيحاولو لكن النهاية واحدة بالرغم كل المحاولات..... لسه حاسة بتعب و ارهاق و صعوبة فى التنفس

 وافتكرت "لبدنك عليك حق" ايه اللى انا باعمله ف بدنى/جسمى ده ...بادمره بالسهر ده !! قعدت افكر فى كل حاجة باعملها بتضر جسمى... السهر... قلة الحركة .. الاكل والشرب الغلط وانى لازم افكر فى اى حاجة قبل ماتدخل جسمى ياترى هتفيده ولا هتضره و انى لازم اتحرك شوية والعب رياضة وانى ماسهرش وانام بدرى وارتاح كل ماللاقى فرصة ..جسمنا امانة لازم نحافظ عليها ,محتاجين نهتم بيه ونفكر ونشغل تفكيرنا بالعناية بجسمنا من كل النواحى .. لازم نهتم باجسادنا  من اجل راحة ارواحنا التى تسكنه

*** بالصدفة بادور عشان اضيف صورة للموضوع قابلت الحلقة دى من خواطر رمضان اللى فات كنت نسيتها :)  

نعمة الاختلاف !!

الغريب فى الامر... ان فى الفترة الاخيرة البنات بقوا شبه بعض اوى لدرجة تسبب الغثيان !! فى هوس غريب و تقليد اعمى من غير مانفكر اذ كان الحاجة دى تناسبنا ولا لأ او حتى تناسب شخصيتنا ولا لأ ... و مع استمرار الحال بتفقد كل واحدة هويتها وبقت نسخة من نسخ كتير تشبها 

ليه بتعملوا فى نفسكو كده ليه؟!! صدقيني اختلافك وتمسكك بذوقك واللى تحسيه مناسب ليك و مرتاحة فيه هو ده جمالك الحقيقي بالرغم انى مش فى بلدى مصر لكن كل مرة بارجع واشوف البنات احسهم كلهم نفس الشكل واللبس وكل حاجة وحتى صورهم ع مواقع التواصل الاجتماعى شبه بعض ...مين اللى قال ان هو ده الشكل البريفكت ؟!! خليكي انتى هو انتى ع طبيعتك من غير تقليد وخلاص

الاختلاف والتنوع نعمة وتخلى الواحد دايما فى تفكير وتطوير وابداع و النقاش لناس مختلفة بيوسع فكرك و نطرتك لحاجات كتير ممكن ماكونتش واخد بالك منها ... ساعات كتير بنقابل ناس للحظات و مجرد كلمات بسيطة خلتنا ناخد بالنا من حاجات مش فى بالنا خالص لكن لما نبقى كلنا واحد خالص مفيش جديد وكلنا معتمدين ع فكر واحد هو اللى يخطط لنا كل حاجة و احنا نمشى واره مع ان ممكن انتى تكون عندك فكرة احسن منها لو شغلتى مخك شوية 

لولا الاختلاف ماكناش هانحس بحاجات كتير .. لولا الحزن ماكناش عرفنا طعم الفرح ولولا الفشل ماكناش هنعرف طعم النجاح واحلى احساس بالراحة مايجيش غير بعد تعب ...والليل والنهار.. الابيض والاسود .... الفصول الاربعة الاختلاف اللى مابينهم و كمان فكرة التغيير فيهم بتوحي لك بحاجات كتير 

 خلى عندك ثقة بذاتك وتقبل نفسك زى ماهى وحبيها وقدريها وبلاش تقلدي حاجة حتى لو مش مقتنعة بيها عشان ده اللى كل الناس بتعمله 

خلى عندك مبادئ و تمسك بها مهما كان واوعى تحسي انك غريبة لأ انتى بتحفظى   ع كيانك و شخصيتك .. خلى كل حاجة فى حياتك تعبر عنك و عن شخصيتك وهايخلي الناس اللى تقربلك الناس المناسبين لكى.. ما تجذبيش الناس الغير مناسبين لحقيقتك بس مناسبين لحاجة انتى بتقلديها من ناس تانية 

انتى جميلة زى مانتى من غير اى اضافات او تعديل ..البساطة هى الجمال 

الحقيقي... عمر ماكانت "الافورة" عنوان للجمال

  خليكي مختلفة وخليكي نفسك مش حد تانى

احلام حقيقية

من الحاجات العجيبة و الجميلة فى نفس الوقت فى حياتى.. حاجات باشوفها فى احلامى قبل ماتحقق .. ازاى و ليه؟؟ الله اعلم بس انا وصلت لمرحلة انى باكون عارفة ان نوع الحلم ده ايه .. مجرد عقلى الباطن ولا رؤية وحاجة هتحصل قريب 
ببساطة لو حاجة كنت بافكر فيها و حلمت بيها بعدها او حاجة شوفتها او سمعتها وحتى اتفرجت ع حاجة ليه علاقة بالموضوع ده يبقى مجرد حلم من العقل الباطن و زى ما فرضت فعلا مفيش حاجة منه بتحصل
لكن الحلم اللى بيتحقق غالبا حاجة ماكنتش بافكر فيها او اشخاص مش ع بالى و فجأة اشوفهم فى الحلم وده معظهم بيتحقق وبالنسبة لى لو حلم مش حلو و صحيت ع شعور قلبى مقبوض غالبا بيحصلى حاجة مش حلوة اليوم ده 

بعد ما دخلت الكلية وافترقنا انا و صديقتى فى الثانوية و الاتصالات انقطعت ما بينا بعد اول شهرين فى الكلية وكل واحد راح فى  طريق مختلف 
فى الاجازة الكبيرة قبل بداية السنة التانية ف الكلية حلمت بيها .. ان انا وهى مع بعض ف فصل واحد و قعدين جنب بعد و اتفقنا نقعد ف اخر دكة وصحيت اتفجئت من الحلم ده لان تقريبا علاقتنا انتهت من فترة كبيرة بس قررت انى ابقى اتصل بيها واحكيلها الحلم بس اللى حصل مختلف تماما 
 اتصلت هى بيا واتفجئت تانى وقولتلها" دانا حلمت بيكي وكنت هاكلمك" فقالتلى"طب احكيلى الحلم كده" حكيت الحلم وقالتلى بجد.. احنا فعلا هنبقى مع بعض وانا حولت للكلية بتاعتك علشان ادخل قسم عمارة .. هى نفسها اتفجئت من الحلم :)

بعد ما اتمت الحج الحمدلله على النعمة دى.. ربنا يرزق كل مشتاق ..كنت راجعة تعبانة جدا وخلصانة بس كنت حاسة براحة سبحان الله زى ماتكون الروح اتغسلت واتصفت من كل الشوائب ورجعت بنفس مرتاحة و مسامحة كل حد كنت زعلانة منه 
حلمت بواحدة كانت زميلة ليا فى الكلية ..هى ماكنتش صديقة مقربة بس كانت شخصية لذيذة و كان بينا حاجات مشتركة كتير..حلمت ان عندها بنت زى القمر ماشاء الله ولابسة فستان جميييل اوووى من كتر جمالها و جمال فستانها مانسيتش الحلم ده .. بعتلها رسالة و سألت عليها .. طبعا نفس الحكاية انى ماكنتش بافكر فيها خالص... و حكيتلها عن الحلم.. فكانت نفسيتها سيئة وحكيتلى انها كانت حامل و الجنين نبضه وقف فى الشهر التالت وطبعا حالتها النفسية تعبانة غير ضغط الاهل فى السؤال وان فى قرايب ليها اتجوزوا بعدها وحملوا وطبعا كل ده كان ضغط نفسى عليها 
الشهر ده طلعت حامل و ماشاء الله حملت تانى ب6 شهور بعد ما ولدت الطفل ده وربنا رزقها و اكرمها مع ان معظم البنات اللى معنا اللى حملوا قبلها او بعدها معندهمش غير طفل واحد بس

و احلام تانية كتير.. هاحكيها بس فى بوست تانى .. راقبوا نفسكم وراقبوا احلامكم واعرفوا الرسالة من الحلم ده ايه  

الغايب الحاضر

خلال فترة ما فى الكلية للسبب ما مش فاكراه ابتديت اقرا كتب و كانت البداية مع كتب الشيخ الشعراوى, كانت كتب صغيرة و تخلص فى اقل وقت , كانت كتب خفيفة و تشدك فى نفس الوقت طبعا ده يرجع للاسلوب السهل الجميل اللى يوصل للقلب من غير اذن للشيخ الشعراوى رحمه الله و جعله فى ميزان حسناته 

فى الوقت ده كنت باخد الكتاب معايا الكلية واقرا فى الوقت الفاضى او حتى فى المترو لانى كنت باقضى فيه وقت كبير جدا و بدأت اقول لاصحابى عليه بحيث يستفيدوا والصراحة كنت طمعانة فى الثواب :D 

الحاجة الوحيدة اللى ياريت كلنا نبقى طمعانين فيها ونفسى كل تفكيرنا اننا نتسابق فى فعل الخير و الفايدة للغير

المهم 

ساعات كنت مع اصحابى نتنقاش فى الكتاب والباقى بردو بالرغم انها ماقرأوش الكتاب بس كان بيسمعوا لينا ويشاركونا النقاش وبيستفيدوا بردو 

مشهد تانى فى محاضرة ما مش فاكرة بردو المادة كانت نظريات العمارة ولا تاريخ العمارة, كانت عن احدى المعمارين المشهورين وبتتكلم عن حياته من يوم ما اتولد لحد ما مات. كلنا كان بنشعر بالملل مش علشان حياته مملة لأ بس اسلوب الشرح الدكتورة عمله بوربوينت و بتعرضه وقعدة تقرأه!!! كان دايما اول جملتين فيه يوم ميلاده ويوم وفاته , طبعا كله كان بيستنى يوم وفاته بيحفظو التاريخ ويستنوا يشوفوا التاريخ ده علشان يعرفوا ان المحاضرة خلاص خلصت, طبعا حياته بتكون مجرد تواريخ متربطة بانجازات عملها 

   حياة معمارى ما.. بعد ما مات و تقريبا كله كان فرح..اتضح ان له تصميمات لسه   بتتبنى و ناس خدت تصاميمه كانت لسه على الورقة و نفذتها فالمحاضرة مستمرة

واحدة قعدة جنبى قالت" الرجل ده مش مات!! " رديت عليها من غير تفكير" لو كان مات ماكنش زمانا بنسمع عنه دلوقتى" وقفت مع نفسى و ركزت فى اللى قولتله شوية وقولت الرجل ده مامتش.. ده لسه عايش و ادركت ان فعلا اننا قادريين نفضل عايشين بالرغم من عدم وجودنا فعليا باجسادنا

فى نفس الفترة.. كان بيشغل بقالى موضوع حديث لرسول الله -صلى الله عليه وسلم-، يقول: عن أبي هريرة -رضي الله عنه- أن رسول الله -صلى الله عليه وسلم- قال: إذا مات ابن آدم انقطع عمله إلا من ثلاث: صدقة جارية، أو علم ينتفع به، أو ولد صالح يدعو له، رواه مسلم  كل تركيزى و تفكير كان فى "علم ينتفع به" وزى ما بيحصل معايا دايما كل فترة بيكون كل حاجة حواليا بتدى اشارة لنفس الموضوع 

فى نفس التوقيت كنت خدت بالى من موضوع زى ما فى صدقة جارية فى ذنب جارى!! و كان الموضوع ده ذكر قدامى كذا مرة وخفت ..خفت نكون عملنا ذنب ولسه لحد دلوقتى شغال عداد السيئات بسببه و احنا مش حاسيين

بدأت افكر ان نفسى اوصل لحاجة تنفع الناس وتفيدهم وفكرت كمان فى اشخاص زى الشيخ الشعرواى و دكتور مصطفى محمود بانهم لسه عايشين معنا لحد دلوقتى و هيفضلو عايشين حتى بعد مانموت وياترى هنقدر نفضل عايشين زيهم و لا هنموت زى معظم الناس اللى جات فى الكون ده؟! الناس دى حققت نقطة عمل ينتفع به و فى نفس الوقت صدقة جارية عداد شغال حسنات باذن الله ورحمة من ربنا و رزق من ربنا اكرمهم بيه 

طبعا محدش يفكر و يقول انتى عايزة تفهمينا انك هتبقى زيهم او هتعملي حاجة زيهم !!! ولا عمركى ما هتوصلى لعلمهم ولا فى مكانتهم 

او احنا ممكن نبقى زيهم ولا فى مكانه !! هارد واقول"ليه؟"ليه دايما بنقارن نفسنا ؟ ليه علطول بنقارن؟ انا شايفة ان كل واحد فى شئ بيميزه عن التانى زى ما كل واحد ليه بصمة ربنا خلقه بيها بتميزه عن غيره ..هاسألك كمان هل الشيخ الشعراوى ينفع نقارنه بــ دكتور مصطفى محمود ولا احمد زويل ولا اى عالم فى اى علم من العلوم المختلفة؟؟؟ طبعا لأ كل واحد متميز و ساب بصمته فى علم مختلف 

كل واحد مميز بحاجة معينة فى علم معين و كل واحد له اسمه .. انت اسمك ايه؟؟ ده محمد متولى الشعراوى و ده مصطفى محمود و ده عبدالله و دى سميرة و انا دينا و انت اى كان اسمك .. ليك اسم و ليك ميزة حاول تعرفها و تنميها .. شوف نفسك شاطر فى ايه؟ او الحاجة اللى بتعملها وانت مبسوط 

اعرف قدراتك فين و نميها و تطورها و شوف هاتبقى فين

خلى حياتك ليها معنى و سيب بصمتك 

خليك دايما حاضر حتى لو جسديا مابقتش موجود 

بس على فكرة مش لازم تبقى زيهم انت ممكن فى الوسط اللى حواليك ممكن تسيب بصمتك بقدرتك على الاهتمام ماهى دى ميزة مش عند كل الناس .. بقدرتك على الحب او مميزات معنوية بتعيش مع ناس بتحبهم وبيحبوك بالرغم من انك مش موجود بس بيفضلوا فاكرينك 

مش عايزين نغيب عايزين نفضل حاضرين و عايشين حتى لو كنا تحت التراب

يلا نسجل...

بقالى فترة كبيرة ماكتبتش حاجة فى بلوجتى العزيزة بس ان شاء الله ده هيتغير من النهاردة .. مشكلتى مش انى معنديش كلام يتقال بالعكس عندى كلام كتيييييييييييييييير بس كله تحت المخدة :)) و ده السبب الحقيقي ورا اسم المدونة
الافكار مابتحبش تيجي غير بليل اول ماحط دماغى ع المخدة و تنزل عليا سيول من الافكار و الذكريات و الاستنتاجات
و غالبا باصحى مش بافتكر حاجة منها

من القرارات اللى عايزة ابدأ انفذها انى ارجع اكتب هنا لانى بارتاح جدا لما احكى او اكتب كل الكلام اللى جوايا .. حاجة صحية جدا على فكرة وبتخرج طاقة غالبا بتكون سالبية لو اتكتمت

حاجات كتير عايزة اسجلها افكار مختلفة عن حاجات كتير و اراء و حاجات اتعلمتها من الحياة و مواقف فى حياتى و ذكريات واحلام و اهداف ووووووووو............. قائمة كبيرة الصراحة .. الافضل انى اسجلها و مش بعيد اسجل قصة حياتى هنا كمان
:P

راجعالك يا مدونتى العزيزة :*

الوطن والغربة :(

من كتاب "الحبيب الافتراضى" لـــ : غادة السمان

الأمل :)

ساعات بتتسأل او بتسأل نفسك يا ترى هاكون فين او ايه بعد كام سنة؟ خلينا نقول سنتين تلاتة اربعة ؟؟

خليك متفائل وأسأل نفسك

هو "باسم يوسف" كان من سنتين تلاته كان يتخيل نفسه دلوقتى :D

خليك "باسم" خليك متفائل

كل اللى عليك تعمله 

اعمل ما تحب حتى تبدع

ابدأ من الآن

واخطو كل يوم للامام

نحو هدفك

ف اتجاه حلمك

وتأكد كل شىء بميعاد

و معادك مكتوب

كل اللى انت محتاجه 

انك تجتهد 

تزرع

و ترعى بذرتك حتى تنبت

وتكبر

و ف نهاية المطاف

هتحصد

محصولك

مجهودك

وهتفرح بيه

ان شاء الله

 :)

Just do your best & Work Hard

اعرف نفسك الاول

ايه الحاجة اللى انت بتحبها وملك الابداع فيها

موهبتك ايه؟

نميها وتطورها 

وابدع فيها